بـــحـــبــك بــالــعــامــيــه الــمــصــريــه
قاعد لوعد السما سهران و مستنظره
و عاجبنى ضوء القمر لكن غريب منظره
يمكن نجوم السما تقدر تفكرنى
القلب مش محتاج لحد يفكره
عديت غريب مضطهد و الغنوة غنوة نوح
زى كل الأنبيا متصاب بداء البوح
بص لى نظرة حب يمكن تطهرنى
و الطهر مش فى البدن الطهر طهر الروح
مستغربك حتى القمر والبحر و خطوط الرصيف
مستغرباك الاغنيات طعم الرغيف
مستغرباك اللهفة فى عيون البنات
حتى كلام الحب فى الغربة سخيف
منيش حزنان و لا خايف و لا غرقان فى بحر الام
و لامحتاج لصوت دافى يطمنى و لو بكلام
و لا قلبك حيفرق لما يحضنى
ما تلمسنيش و ماتجيش تانى فى الاحلام
باين عليك طيب و ح تغنى
لو تبتدى قلبك ح يفهمنى
باين عليك فيك م الملايكة كتير
و من البشر فيك حاجه ح تخونى
بين السعادة و العذاب فى 1000غنوة
سعات تلاقى فى الزحام نفسك فى خلوة
الفرق بين الجنة ايه و النار
مساحة الاختيار و صبية حلوة
عصفورة جت م القمر تعشقنى كام ساعة
و تحى اللى اتقتل جوايا بشجاعة
بصيت لقيت فى عنيها كل اللى بحلم به
ملعون ابو الاحلام لو تبقى شماعة
بينى و بينك سور يا عصفوره 
و حرس بحر شطوطه مسحورة
بينى وبينك العشق خلانى
عديت كما الابطال ف أسطورة
أحزن ده حزنك نبى
فى طوفان عنيك مركبى
عدت لجنتها
لقت الملاك اجنبى
يا حبيبتى يا أخر برج مراقبة ف خانة اليك
انا جايلك رغم الحزن و رغم الجرح و رغم الشك
انا جايلك شايل حلم بيحلم بيكى
اتاريكى فى قلبى و قلبى عليه الرك
حدوته بنت الإيه عجبانى ضحكتها
وكلامها وقت الدلع بصتها شهقتها
و عاجبنى فيها الشجن و الدمع و الاحزان
بركان مشاعر حرقنى لما بحت لها
أقتل وقاتل و حارب و ادخل الحواديت
أحرق ودمر و خرب ديتها عود كبريت
الدنيا غابة كبيرة وانت سيدها
بدايتها لو تختلف نهايتها فى التوابيت
ليه الصليب كان خشب و التمن فضه
و الحلم ليه معجزة مش شغلة تتقضى
أحلم وما يهمكش م الاحلام
الدنيا متنظمة ..أحراش ...غابات فوضى
مش فاكر لو انك جميلة و بعشقك
أو ان لما تحبى قلبى يحن لك
انا بعشقك رغم الزحام والضلمة و الخنقة
وعشان سعات لما يخاف القلب يبص لك
القلب اخضر و العيون فزدقى
اجمل من الحواديت اذ تصدقى
ما تبعديش قلبك يتوه منى
ما تقربيش كمان اخاف تغرقى
شلة نجوم فى السما بتغنى حواليكى
و كمان عيون القمر بتبص ف عنيكى
أنا قلتلك ما تكلميش حد ف غيابى
لو حتى كان م السما يبقى اترمى بيكى
وطن جميل مبتسم عايش ف أسطورة
و رجاله عشاق و شعرا و حكومته عصفورة
و الخير بيهجم كل يوم هجمه
يا قوادين اختشوا مش هى دى الصورة
القلب مش محتاج سواد أكتر
كان لما يكبر حلمنا يصغر
ح أفضل معاك و ح أغنى للعشاق
و العشق ما يعرفش خط له أحمر
قلبك مسافر لما بعد المستحيل
لساه بيقدر يبتسم لساه جميل
قلبك ملاك خلاك نبى
بس النهار مش عبقرى و الليل بيبقا طويل
بالى * و ليالى الفوضى و العشاق
و تاريخ بيعرف يغازل جغرافية الأشياء
و نهار بيرسم ضحكة ملونه و فرحه
و انا جوة قلبك يا سمرة تصدقى مشتاق
